Мамытов: Кумтөр боюнча сүйлөшүүлөрдү жүргүзүүгө Centerra юристтери келди

БИШКЕК, 24-фев — Sputnik. Кыргызстанда Кумтөр долбоорунун реструктуризациясын талкуулоо үчүн бир аптага Франк Херберд башында турган Centerra Gold Inc. компаниясынын юристтер тобу келди. Бул туурасында "Кыргызалтын" ААКтын төрагасы Токон Мамытов Sputnik маалымат сайтына билдирди.

Анын айтымында, бул мезгил аралыгында тараптар реструктуризация боюнча макулдашууну талкуулайт. 

"Аларда да, бизде да макулдашунун жумушчу варианты бар. Парламент бул маселени карап жана өзүнүн чечимин билдиргенден кийин документтерге жыйынтыктоочу кол коюлат", — деп айтты Мамытов. 

Ал юристтерди жетектеп келген компаниянын баш юристи Франк Херберд өкмөт башчысы Жоомарт Оторбаев менен жолугаарын айтты. 

Февралдын башында министрлер кабинети канадалык тарап менен биргелешкен ишкана түзүү боюнча макулдашууга келе электигин билдирген. Тараптардын жолугушуусунун жана кеңешүүлөрүнүн жыйынтыгында, корпоративдик-укуктук суроолор боюнча ача пикирлерде, экология боюнча АМЕС компаниясынын сунуштарын ишке ашыруу боюнча тил табышууга мүмкүнчүлүк болгон. Андан сырткары боло турган реструктуризациянын бардык экономикалык- каржылык аспектилери боюнча жасала турган биргелешкен мындан аркы кадамдар аныкталды. 

2014-жылдын 6-февралында Жогорку Кеңеш өкмөт менен Centerra Gold Inc. компаниясынын ортосундагы бекитилген макулдашууну жактырган. Министрлер кабинетинен "Кыргызалтындын" үлүшүнүн реструктуризацияланышы боюнча жаңы макулдашуу 2009-жылдагы макулдашууга негиз катары алынат. "Кумтөр" кенин иштетүүнүн жаңы шарттар боюнча "Кыргызалтын" жана Centerra бирдей үлүштөгү биргелешкен ишкана түзүлөт. Учурда кен боюнча сүйлөшүүлөр жүрүп жатат. 

Өкмөт "Кыргызалтынга" 100 пайыз ээлик кылат. "Кыргызалтын" республикадагы алтын кенин иштеткен бирден-бир мамлекеттик ири ишкана.