БИШКЕК, 24-фев. — Sputnik. Көрүнүктүү илимпоз жана коомдук ишмер Кайып Оторбаев 93 жашында дүйнөдөн кайтты. Улуу инсан менен коштошуу зыйнаты ал көп жылдар бою ректор болуп иштеген Улуттук университетте жүрүүдө.
Кайып Оторбаев 1922-жылы Кемин районуна караштуу Тегирменты айылында туулган.
Ал Экономикалык жана социалдык география адиси, илимдин 5 докторун, 18 кандидатын даярдаган. 300дөн ашуун илимий эмгектерди жазган.
Кайып Оторбаев Экинчи дүйнөлүк согушка катышкан. Көрсөткөн эрдиги үчүн "Кызыл жылдыз", "Эрдик үчүн" жана "1941-1945-жылдардагы Улуу Ата мекендик согушта фашисттик Германияны жеңген үчүн" медалдары менен сыйланган.
Кайып Оторбаев Улуттук илимдер академиясынын Экономикалык иликтөөлөр борборунун жаратылыш ресурстарын пайдалануу жана божомолдоо бөлүмүн жетектеген.
Улуттук илимдер академиясынын академиги Кайып Оторбаевдин каза болгондугуна байланыштуу анын үй-бүлөсүнө материалдык жардам көрсөтүү үчүн президенттин социалдык коргоо жана колдоо фондунан 100 миң сом бөлүндү. Кайып Оторбаевдин сөөгү Ала-Арча көрүстөнүнө коюлат.
Кайып Оторбаев премьер-министр Жоомарт Оторбаевдин атасы.
