Бишкек, 16 фев — Sputnik. "Роснефть" мамлекеттик мунай компаниясынын төрагасы Игорь Сечин Financial Times гезити үчүн жазган өз макаласында РФке каршы киргизилген Европа биримдигинин санкциялары алыскы келечекте кандай зыян келтирерин белгилеген деп билдирет РИА Новости.
"Алыскы келечекте Россияга каршы киргизилген санкциялар Европага (күйүүчү майды) сатууга коркунуч жаратат", — деп жазат Сечин, Иранга каршы чектөөлөрдү мисал келтирүү менен. "Иранга каршы киргизилген санкциялар мунайды сатууга жана тышкы сооданын тең салмактуулугуна кесепетин тийгизди", — деп белгилейт ал.
АКШ менен ЕБ Россиянын саясатчыларына жана ишкерлерине каршы санкцияларды кантип киргизишти
Батыш өлкөлөрү Россиянын Украина боюнча көз караштарынын себебинен март айынан тартып РФтин бир катар саясатчыларына, ишкерлерине жана компанияларына каршы бир нече ирет санкцияларды киргизген. Мындай чаралар акыркы жолу декабрда көрүлүп, анда АКШнын президенти Крымга экономикалык блокада жарыялаган. Ал эми санкциялык тизмеге Крымдын жана Украинанын чыгышынан бир катар белгилүү ишмерлер киргизилген.
Россия Батыштын санкцияларына кандайча жооп берди
Россиянын президенти Владимир Путин 6-августта коопсуздукту камсыз кылуу үчүн айрым атайын экономикалык чараларды көрүү жөнүндө жарлыкка кол коюп, ага ылайык Москвага каршы санкцияларды киргизген бир катар өлкөлөрдөн азык-түлүктү импорттоого бир жылга чек коюлган. Тийиштүү тизмеге уйдун, канаттуулардын, чочконун эти, жемиштер, быштак жана сүт азыктары, жаңгактар ж.б. азык-түлүктөр кирген.
