БИШКЕК, 13-фев — Sputnik. Сахароводогу миграциялык борбордогу начар шартка мигранттар даттанып жатканын Кыргызстандын Россиядагы элчилиги билдирди.
11-февралда элчиликтин консулдук кызматкерлери Сахарово айылындагы мамлекеттер аралык миграциялык борборго (ММБ) жаңы эмгек патенттерин берүү процесси менен таанышуу максатында барышкан.
Бир гана ММБдин консультанттарына жазылуу үчүн жана документтерди тапшыруу үчүн берилген талонду алууда үч миңден ашык кыргызстандык кезекке турганын элчиликтен билдиришти.
"Павильондо чак-челекей түшүп, бири-бирин жөөлөгөндөр көп. Биздин жарандар менен сүйлөшкөндө алар жок дегенде эле 3-5 саат кезекте турганын айтышты. ММБдын консультанттарынын маалыматы боюнча, алар бир күндө кезек күткөн 3 миң кишинин миңине гана кызмат көрсөтүүгө мүмкүнчүлүгү жетет. Миграциялык борбордун күзөтчүлөрү айткандай, борбор ачыла электе эле анын алдына 1,5 миңдей киши кезек күтүп топтолуп калат", — деп элчиликтен маалымдашты.
Элчилик ошондой эле, миграциялык борбордун аймагын кайтарган "Кельт" ЖЧКсынын кызматкерлери чет элдик жарандарга өтө орой мамиле жасап, аларды кагып-силкерин да кошумчалады.
"ММБдин аймагы тикенек зымдар менен тосулуп, иттер менен кайтарылат. Мындай абал абакты эске салып, келген кишилерге моралдык-психологиялык басым жасайт. Жогоруда келтирилген фактылар ММБдин көп сандагы эмгек мигранттарын тейлөөгө даяр эместигин айгинелеп турат", — деп айтылат элчилик тараткан билдирүүдө.
Элчилик тарабынан Россиянын Тышкы иштер министрлигине ММБдин ишмердигине кийлигишип, түзүлгөн абалды жөндөө боюнча нота жиберилди.
Азырынча бул факты боюнча Сахарово айылындагы мамлекеттер аралык миграциялык борбору маалымат бере элек.
