БИШКЕК, 12 фев — Sputnik. "Нормандиялык төртиликтин" лидерлери байланыштыруучу топ кабыл алган чечимдерди аткаруу боюнча иш-чараларды жактырышты — декларация деп билдирет РИА Новости.
Документке ылайык, ок атуулар Украинанын бүтүндөй аймагы боюнча 15-февралда жергиликтүү убакыт боюнча түнкү саат 12.00дө токтотулат.
Минск документи ошондой эле ЕККУнун көзөмөлү алдындагы бардык чет элдик аскер курамдарын, техниканы жана жалданма жоокерлерди Украиныдан чыгарып кетүүнү карайт. "Нормандиялык төртилик" ЕБ, Украина жана Россия ортосундагы сүйлөшүүлөрдү колдой турганын жана Атлантикадан Тынч океанына чейин бирдиктүү гуманитардык жана экономикалык мейкиндик түзүүнү кааларын баса белгилейт.
"Нормандиялык төртиликтин" декларациясы Донбастын өз алдынча башкаруу органдары прокурорлор менен сотторду дайындоодо, элдик милиция курамдарын түзүүдө катыша ала тургандыгын карайт.
"Донбасстын өзгөчө статусунда амнистия, тил жагынан өзүн өзү аныктоо укугу, РФтин аймактары менен чек ара аркылуу кызматташтык каралышы керек", — деген Минск документинен сөздөрдү келтирет агенттик.
ДЭРдин лидери Сергей Захарченко Минскте кол коюлган макулдашуулар бузула турган болсо, эч кандай башка жаңы меморандум болбойт деп билдирди.
Германиянын ТИМ башчысы Франк Вальтер-Штайнмайер Россия, Украина, Германия жана Франция өлкөлөрүнүн жетекчилери Минск декларациясына кол койбостон, аны оозеки ырасташканын айтты.
Франциянын лидери Франсуа Олланд: "Биз Украинадагы каатчылыкты саясий жөнгө салуу жөнүндө жалпы макулдаштыкка келдик" деди.
Минск документинин авторлору ДЭР менен ЛЭРдин өзүнчө райондорунда ЕККУ менен ДИАУБнын стандарттарын сактоо менен шайлоолор өтө турганы документте каралат деп убада кылышты.
"Нормандиялык төртилик" Украинанын чыгышындагы чыр-чатакты жөнгө салуу боюнча Россия, Германия, Франция жана Украина өлкөлөрүнүн жогорку даражалуу өкүлдөрүнөн турган дипломатиялык топ болуп эсептелет. Ал 2014-жылдын сентябрында Нормандияда (Франция) түзүүлгөн. Минскте (Беларусь) өткөн акыркы жолугушуунун жүрүшүндө төрт өлкөнүн лидерлери Донбастагы кырдаалды жөнгө салуу маселелерин талкуулашты.
