БИШКЕК, 26-янв — Sputnik. УКМКнын кызматкерлери Ош облусунда эл аралык террористтик уюмдун мүчөлөрүн кармап, уюмдун ишмердүүлүгү токтотулду. Бул туурасында аталган кызматтын маалымат кызматы билдирди.
Эл аралык террористтик уюмдун кармалган алты мүчөсүнүн төртөө Сириядагы террористтик уюмдардын лагеринен атайын даярдыктан өтүп келишкен.
УКМКнын Ош шаардык жана Ош облустук башкы башкармалыгынын кызматкерлери жүргүзгөн атайын операцияда аталган топтун мүчөлөрүнөн бир нече автоматтар, ок-дарылар, тапанча, газ менен дүрмөттөлгөн тапанча, бет каптар, кол каптар, бычак жана автоунаанын эки мамлекеттик номери алынган.
Аталган факты боюнча, Кылмыш Кодексинин төрт беренеси менен кылмыш иши козголду. Алар: жасалма документтерди даярдоо, сатуу жана пайдалануу жана жалданмачылык боюнча беренелер.
УКМКнын Ош облустук жана Ош шаардык башкармалыгы 2014-жылдын башынан бери терроризмге каршы күрөшүү иштеринин алкагында буга чейин бир нече террористтик топторду кармаган.
УКМК басма сөз кызматынын берген маалыматында, Сирияда жүрүп жаткан чыр-чатактарга катышуу үчүн 2011-2014-жылдар аралыгында Кыргызстандан 200гө чукул адам кеткен. Алардын бир катары Кыргызстанга кайтып келип, өлкө ичинде жана коңшу мамлекеттерде теракт уюштурууну пландап, бирок, ал УКМКнын Ош шаардык жана Ош облустук башкы башкармалыгы тарабынан кармалган.
