БИШКЕК, 27-дек — Sputnik. Келгиле өлкөбүздү сүйөлү, кичине объективдүү маалымат берип, чымын болбой, аары бололу деген пикирин өлкө президенти Алмазбек Атамбаев жыл жыйынтыгы боюнча берген маалымат жыйында билдирди.
Анын айтымында, Кыргызстанга европадагы интеграциялык биримдиктен комиссия келген, алар "Кыргызстан нормалдуу эле мамлекет экен" деп абдан таң калды.
"Жорж Сорос менден Түркиядагы кыймылсыз мүлк тууралуу, сойкукана тармактары боюнча да сурашты. Алар мага тиешелүүбү деп да кызыккандар болду. Мындай нерсе мен үчүн уят. Каалаганыңарды жазгыла, бирок фактылардын негизинде жазгыла. Чочко бардык жерде чалчыкты табат. Чымын болбой, аары болгула. Бул биздин мамлекет, бул силердин мамлекет. Келгиле, мамлекетти кичине-кичине сүйүп, объективдүү жазалы", — деди ал.
Атамбаев ошондой эле өлкөнүн Бажы биримдигине кирүүсүнө каршы өтүп жаткан акциялардын баарын кызыкчылыгы бар тараптар каржылап чыгарып жатат деп эсептейт.
"Мамлекетти мынчалык жаман көрүүгө болбойт. Бизде журналисттерди даярдаган 10 жогорку окуу жайы бар, бул дагы маселе. Мыкты окутуучулары иштеген бир гана жогорку окуу жайы даярдаса, балким жакшы болмоктур. Журналистика – маалыматты объективдүү берүү дегендик эмеспи", — деп кошумчалады президент.
ЖМК өкүлдөрүнө кайрылган мамлекет башчысы, алардын айлык акысынын жогорулашын, бирок, ал буюртма макалалалардан эмес, ата мекендик, өнүккөн журналистиканын эсебинен болушун каалады.
