БИШКЕК, 13-дек — Sputnik. Премьер-министр Жоомарт Оторбаев Россиянын президентине караштуу Башкырстан Республикасынын ыйгарым укуктуу өкүлү Артур Шайнуров жетектеген делегация менен жолугушту. Бул туурасында өкмөттүн маалымат кызматы кабарлады.
Премьер-министр жолугушууда Башкырстандын бизнесмендеринин сапарына чоң маани берилээрин белгиледи.
2-3-декабрында Башкырстанга болгон иш сапардын жыйынтыгы боюнча, өкмөт башчы тийиштүү министрлик жана ведомстволорго тапшырма берген. Алар Кыргызстан жана Башкырстан аралык соода-экономикалык, илимий-техникалык жана гуманитардык кызматташуу боюнча өкмөт аралык комиссиясын түзүү жолдорун иштеп чыгышы керек эле. Анын ичинен Айыл чарба министрлигине да жогорудагыдай тапшырма берилген.
"Мен, бул республикада болгонумда агроөнөржай комплекси жаатындагы ийгиликтерди көрүп, ыраазы болдум. Бизде жаратылыштык абалды, аба ырайын эске алуу менен айыл чарба продуктуларын натыйжалуу алмашуу жаатындагы көптөгөн мүмкүнчүлүктөрүбүз ", — деди Өкмөт башчы.
Өкмөт башчы учурда эки республиканын кызматташуусу алкагында айыл чарба продукциялары боюнча соода-логистикалык борборлорун түзүү келечегин белгиледи.
Мындан сырткары туризм жаатындагы эки тараптуу кызматташуу темасы да козголуп, КР өкмөт башчысы эки өлкөнүн өз ара иштешүүсүндө социалдык туризм долбоорун ишке ашыруу мүмкүндүгүн айтты.
"Россия Федерациясында калктын аялуу катмарын колдоо боюнча мамлекеттик программа бар. Биз Кыргызстандын аймагын бул мамлекеттик буйрутманы ишке ашыруу үчүн пайдаланууну сунуштайбыз», — деди ал.
Башкырстандын ыйгарым укуктуу өкүлү Артур Шайнуров Кыргызстан менен активдүү кызматташууга кызыкдар экендигин билдирди.
"Эки өлкө ортосундагы мамилелер жаңы сапаттык деңгээлге чыгуусу кажет. Башкырстан президенти Рустэм Хамитов «Борборду Азияга терезе ачты». Биз эми жергиликтүү бизнес менен активдүү иштөөгө ниеттенүүдөбүз", — деди Артур Шайнуров.
Ал маалымдагандай, Кыргызстандын ишкерлери менен жолугушуунын жыйынтыгында кызматташуу боюнча 7 документке кол коюлган.
