БИШКЕК, 9-дек — Sputnik. Өзгөчө кырдаалдар министрлигинин Гидрометеорология агенттигинин маалыматына ылайык, Бишкек – Ош унаа жолунун 121-137 жана 198-267-чакырымдарында, Ош облусундагы Мырзаке – Кара-Кулжа – Алайкуу унаа жолунун 45-90 жана 145-150-чакырымдарында кар көчкүсү түшүшү мүмкүн.
Өкмөттүн атайын токтомунун негизинде жол кыймылындагы тобокелчиликтин алдын алуу максатында 9-12-декабрь күндөрү КР Куралдуу күчтөрүнүн Башкы штабынын Балыкчы жана Ош шаарларындагы аскер бөлүгүнөн артиллериялык топ ишке тартылды.
Кар көчкүлөрүн атып түшүрүү учурунда Бишкек – Ош унаа жолу жана Мырзаке – Кара-Кулжа – Алайкуу унаа жолу убактылуу жабылат. ӨКМдин басма сөз кызматы жарандардын бул күндөрү аталган жолдорго сапар албай туруусун эскертет.
