Тайраңдаганды токтоткула, туугандар. Үн катпай койгондук — корккондук деген эмес. Аны өзбек туугандар качан түшүнөр экен? Үңкүр-Тоодогу телемунаранын кызматкерлерин Өзбекстандын Жаңы-Коргон РИИБине алып кетишиптир. Бүгүнкү күнгө чейин аларды бошотпой жатышат. Чек арадан мыйзамсыз өткөн жаранын кармай коюп, заматта күнөөлүү болдук эле. Эми кандай болот? Мыйзамдуу түрдө иштеп жаткан жарандар эмнеге алынып кетиши керек?
Аңгыча биздин чек арачылар үн катышты. Бошотуп берүү талабын коюп жатышыптыр. Менимче, булардан жөн гана сурануу аздык кылат.
Өлкө башчы Алмазбек Атамбаевдин чек ара боюнча жыйын курганы го жакшы. Бирок күнөөнү өткөндөргө оодара салуу менен маселе чечилбейт. Абал курчуп кете электе, өзү кийлигишүүсү зарыл.
Ал арада Италияда жер титирөө болуп эки шаарды кыйратты, каза болгондордун саны улам өсүп жатат…
Акыркы маалыматтар боюнча 159 адам каза болуп, 368 киши жаракат алган. Биздин Тышкы иштер министрлик жабыркагандардын арасында кыргызстандыктардын бар-жогун аныктап жатканын айтты. Кудай ушундай бөөдө кырсыктан алыс кылсын…
Өткөндөр баркталмайын, азыркылар даңкталбайт. "Ата Бейитке" колодон жасалган ири барельеф орнотулууда.
Мемориалдык комплексте Тарых жана маданият жылына арналган көп фигуралуу композицияны орнотуу иштери аяктап жатат.
Быйылкы жайдын башкы темасы Конституция. Борбор калаада Конституцияны өзгөртүү боюнча тегерек стол өтүп, ага депутаттар, жарандык коомдук өкүлдөрү, бийликтегилер чогулду. Тараптар ийри отуруп, түз чечим кабыл алуунун аракетин көрдү. Сүйлөшүп эле атышат, сүйлөшүп эле табышат, натыйжасы канчалык болгонун дагы көрө жатарбыз…
Буюрса, 25 жылдык кызуу белгиленет. 31-август эгемендүүлүктүн майрамын белгилөө үчүн иш-чаралардын программасы түзүлдү.
Баса, сиздерге сүйүнчүбүз бар. Самат аттуу уста кадимки аркардын мүйүзүнөн байыркы кыргыздар колдонгон жааны жасады. Видеосу бул жакта.
Бүгүн өлкө аймагында аптаптуу аба ырайы сакталат.
Валюта баасы. Бүгүн сомдун баасы долларга карата орто эсеп менен 68.61 (сатып алуу) жана 68.80 (сатуу) сомду түздү.
Мунай баасы. Бишкекте Аи-95 үлгүсүндөгү бензин 38.30 сом, Аи-92 үлгүсүндөгү май 35.20 сом, ал эми дизель майы 30 сомдон сатылууда.
Соңку сөз ордуна. Жакынкы кошуна алыскы туугандан артык.
Бир күн уруш болгон жерден 40 күн ырыскы качат, туугандар! Исмаил Мамытов.
