БИШКЕК, 10-ноя. — Sputnik. 9-ноябрь күнү Армениянын премьер-министри Никол Пашинян, Азербайжандын президенти Ильхам Алиев жана Россия лидери Владимир Путин тарабынан Тоолуу Карабах аймагында куралдуу тирешүүнү токтотуу боюнча келишимге кол коюлду. Бул тууралуу РИА новости жазды.
Келишимге ылайык, Тоолуу Карабахка россиялык тынчтык орнотуучулар барат. Ал эми Армения менен Азербайжандын куралдуу күчтөрү мурда ээлеп турган позициясында калышат.
Үч мамлекеттин башчылары дагы эмне тууралуу макулдашты:
- 2020-жылдын 10-ноябрында саат 00.00дө (Москва убактысы боюнча) ок атууну токтотуу;
- Азербайжан менен Армения азыркы ээлеген позициясында токтошот;
- Агдам району менен Газах районундагы аймак 2020-жылдын 20-ноябрына чейин Азербайжанга кайтарылат;
- Ошондой эле Армения 15-ноябрга чейин Азербайжанга Кельбаджар районун, 1-декабрга чейин Лачин районун кайтарат. Бирок туурасы 5 чакырым болгон Лачин коридорун өзүнө калтырат. Ал Тоолуу Карабах менен байланышты кармап турууга жардам берет, ошол эле учурда Шушу шаарына тиешеси болбойт;
- Тоолуу Карабахтын жана Лачин коридорунун чет жакаларында 90 сооттолгон транспортер, 380 атайын техника менен Россиянын 2 миңге чукул тынчтык орнотуучулары жайгашат;
- Россиялык аскерлер ал жакта беш жыл кызмат өтөшөт. Эгер тараптардын бири белгиленген мөөнөт бүтөрүнө алты ай калганга чейин түзүлгөн кырдаалды токтотуу боюнча каалоосун билдирбесе, россиялык тынчтык ортотуучулар дагы беш жылга кала берет;
- Ок чыгарууну токтотуу боюнча көзөмөл кылып туруу боюнча тынчтык орнотуу борбору ачылат;
- Жакынкы үч жылда Лачин коридору боюнча жаңы маршрут түзүлүп, кийин Россия аскерлери бул аймактагы тынчтыкты көзөмөлдөө үчүн жакын жерден орун алышат. Азербайжан бул коридор аркылуу болгон бардык кыймылдар боюнча коопсуздукту кепилдейт;
- Тоолуу Карабахтан качып кеткен жарандар БУУнун көзөмөлү алдында үйлөрүнө кайтышат;
- Туткунга алынган аскерлер жана каза болгондордун сөөктөрүн алмашуу болот;
- Транспорттук кыймылдарга чектөө коюлуп, каттоолорду Россиянын Федералдык коопсуздук кызматы көзөмөлдөйт;
- Нахчыван Автономдуу Республикасы менен Азербайжандын батышындагы райондорду байланыштырып турган жолдор курулат.
