БИШКЕК, 26-сен. — Sputnik. АКШ президенти Дональд Трамп алдыдагы шайлоодон өтпөй калса бийликти "тынчтык жолу" менен өткөрүп берүүнү кааларын, бирок анын утулуп калышына атаандаштарынын — демократтардын почта аркылуу добушту алдамчылык менен чогултуп алышы себеп болорун билдирди. Бул тууралуу РИА Новости жазды.
Америка лидери күн мурун Виргинияда тарапташтары менен жолуккан.
"Эгер алар алдоо аракеттерине өтсө, шайлоодон утулуп калабыз. Биз мындайга жол бере албайбыз, алар бийликке келсе мамлекетти жок кылышат. Булардын митаам оюн жана алдыда эмне болорун ЖМКлар, ошондой эле демократтар өздөрү дагы жакшы билишет. Биз бийликти тынчтык жолу менен өткөрүп берүүнү каалайбыз. Бирок алдамчылык жол менен чогултулган миңдеген бюллетендердин аркасы менен мындай кадамга баргыбыз келбейт. Андай нерсеге чыдабайбыз дагы", — деген Трамп.
Ошондой эле ал шайлоо бүтөрү менен эле жеңүүчү аталып калбай, бир топ талаш-тартыштуу учурлар болуп калышы мүмкүндүгүн кошумчалаган.
АКШ президенти Дональд Трамптын жээни аны сотко берип, себебин түшүндүрдү
Белгилей кетсек, буга чейин АКШ лидери Трамп президенттик шайлоодо жеңилип калса бийликти тынчтык жолу менен өткөрүп берүүнү кепилдей алган эмес. Себеби почта аркылуу добуш берүү чатак иш экендигин айткан.
АКШда президенттик шайлоо 3-ноябрда өтөт. Трамп экинчи мөөнөт үчүн ат салышат. Так талашта ага демократтардын өкүлү, 77 жаштагы Жо Байден атаандаш болот.
