БИШКЕК, 19-авг. — Sputnik. Компьютердин клавиатурасында көп сандаган микробдор болгондуктан, ар кандай тери жана көз ооруларын пайда кылышы мүмкүн. Бул тууралуу Hi-Tech Mail.ru долбоорунун жетекчиси Дмитрий Рябинин Sputnik радиосуна айтып берди.
Адис клавиатураны ден соолук үчүн кооптуу буюмга айланткан бирден-бир себеп гигиенанын жоктугу экенин айтат.
"Клавиатураны маал-маалы менен тазалабай, кир бойдон колдонгондор аз эмес. Байкасаңар, адам компьютерде иштеп жатканда көзүн көп ушалайт. Ошол учурда микробдор кишиге оңой жабышат", — деди Рябинин.
Анын айтымында, ден соолукту коргоонун эң оңой жолу — клавиатураны жок дегенде айына бир ирет тазалап туруу. Бул үчүн микробдорду жок кылуучу каражатка майлыкты нымдап алып сүртүп коюу жетиштүү. Ошондой эле курамында спирт бар нымдалган салфеткалар дагы пайдалуу.
Компьютерте көп отургандар ден соолугун кантип сактаса болот. Кеңештер
Бирок Рябинин клавиатураны санитардык техника үчүн чыгарылган каражат менен сүртүүгө болбой турганын эскертет. Анткени алардын курамында химиялык күчтүү заттар көп болгондуктан, компьютерди жана ага тиешелүү майда-чүйдөнү иштен чыгарып коюшу ыктымал.
