БИШКЕК, 29-янв. — Sputnik. Кытайдагы жаңы коронавирустун таралуу масштабы 2002-2003-жылдардагы типтүү пневмония (SARS) эпидемиясынын көрсөткүчтөрүнөн ашып кеткенин кытай бийлиги тарабынан жарыяланган маалыматтар тастыктайт.
Учурда коронавирустун жаңы тибин жуктуруп алгандардын саны 5999 адамга жетти (9239 киши ооруга шектелүүдө), анын 132си каза болсо, 104 адам оорудан айыккан.
Пневмониянын оор түрү же SARS 2002-жылы ноябрда алгач ирет Кытайдын Гуандан провинциясында катталган. Бул ооруну жуктурган акыркы учур 2003-жылы июнда катталганы маалым. Дүйнөлүк саламаттык сактоо уюмунун маалыматы боюнча, бул вирус менен Кытайдын аймагында эле 5327 бейтап катталса, 349 адам каза болгон. Жалпысынан 30 өлкөдөн оору жуктургандар катталып, бардыгы 8,5 миңди түзгөн. Жыйынтыгында 900 адам көз жумган.
Коронавирус 2019-nCoV
Кытай эксперттеринин айтымында, вирус 1-2 метр аралыкта аба аркылуу жана кир кол менен көздү сүрткөндө адамга жугат. Башкы белгилери — кургак жөтөл, дем алуунун кыйындашы, дене табынын көтөрүлүшү, алсыроо.
Кээ бир учурларда оору пневмониясыз эле өтүп, бейтап жөтөлүп, дене табы өтө жогорулабаган абалда жүрөт. Оорунун жеңил түрүндө да жугузуп алуу коркунучу бар.
