Сауд Аравиянын Башкы прокуратурасы журналист Хашукджинин өлгөнүн ырастады

БИШКЕК, 20-окт. — Sputnik. Сауд Аравиялык журналист Жамал Хашукджи каза болду. Анын өлүмүнө Стамбулдагы консулдукта иштегендер менен болгон пикир келишпестиги себеп болгон. Бул тууралуу Сауд Аравиянын башкы прокурору Сауд Аль-Муаджиб билдиргенин РИА Новости агенттиги жазды. 

Американын Washington Post гезитинде баяндамачы болуп иштеген сауд аравиялык журналист Хашукджи 2-октябрда жоголуп кеткени кабарланган. Ал Сауд Аравиянын Стамбулдагы консулдугуна кирип, ошол бойдон чыккан эмес.

"Тергөөнүн алдын ала жыйынтыгы журналисттин каза болгонун аныктады. Ал консулдукта иштегендер менен чырлаша кетип, ага кол көтөрүшкөн. Мындай аракеттер журналисттин өлүмүнө алып келген", — дейт башкы прокурор.

Журналисттин жоголушу боюнча жалпысынан 18 киши кармалып, тергөө амалдары дагы улантылууда. Башкы прокурор журналисттин өлүмүнө тиешеси бар бардык кишилер өлкөнүн мыйзамы алдында жооп берерин баса белгиледи.

Кызматтан алынгандар

Аталган окуядан кийин Сауд Аравия падышачылыгынын Жалпы чалгындоо кызматынын жетекчисинин орун басары Ахмед Асири кызматтан кетти. Андан сырткары, падышанын канцеляриясынын кеңешчиси Сауд ал-Кахтани иштен алынды. Өз кезегинде Сауд Аравиянын падышасы Салман бен Абдель Азиз Аль Сауд падышачылыктын чалгындоо кызматынын түзүмүн өзгрөтүүнү буюрду.

Ал эми АКШ президенти Дональд Трамп журналисттин жоголушунан улам Сауд Аравияга карата бир катар санкциялар киргизилиши ыктымалдыгын кыйыткан.