Садыр Жапаров Facebook студиясынан түз эфирге чыгып кайрылуу жасады. Видео
23:26 02.11.2021 (Жаңыртылды: 14:27 14.12.2021)
© Facebook / Администрация Президента КР
Жазылуу
Мамлекет башчы саммиттин алкагында отуздан ашык лидерлер менен жолугушуп, эки тараптуу кызматташтыкты тереңдетүү жөнүндө макулдашканын белгиледи.
Президент Садыр Жапаров Facebook студиясына барып түз эфирде кыргызстандыктарга жана аталган ири социалдык түйүндүн колдонуучуларына кайрылуу жасады. Бул туурасында президенттин маалымат кызматы билдирди.
Ал Facebook тармагынын жетекчилигинин чакыруусу менен студияга келип сүйлөп жатканын айтты.
Белгилей кетсек, мамлекет башчы Глазго шаарындагы экологиялык саммитке катышууда.
Жапаровдун кайрылуусун тезистик түрдө беребиз:
- Дүйнө лидерлеринин саммитине 120 өлкө катышып, алардын катарында Кыргызстан да бар;
- Биз дагы климаттын өзгөрүүсү боюнча дүйнө коомчулугу көңүл бура турган маселелерди көтөрүп, өз көйгөйүбүз тууралуу кайрылуу жасадык;
- Эки күн ичинде отуздан ашык мамлекет жетекчилери менен жолугушуп, эки тараптуу кызматташтыкты тереңдетүү жөнүндө макулдаштык;
- 2022-жылдын 2-мартында Кыргызстандын БУУга мүчө болгонуна 30 жыл толот, бул мезгил аралыгында уюмдун активдүү мүчөсү боло алдык;
- Кыргызстан дегенде асман тиреп, көк мелжиген тоолор, андагы ак кар, көк муздуу мөңгүлөр, жашыл токойлор, жылга-жылгадан шылдырап агып түшкөн өзөн, суулар элестейт! Моюнга алуу керек, климаттын өзгөрүүсү биздин көз жоосун алган жаратылышыбызга терс таасирин тийгизип, зыян келтирүүдө;
- Таза суунун булагы болгон мөңгүлөрдү дүйнө коомчулугу менен биргеликте сактап калуу — бүгүнкү күндүн орчундуу маселеси;
- Буга чейин БУУнун трибунасында 2022-жылды кайрадан "Эл аралык тоолор жылы" деп жарыялоону, тоолуу аймактарды туруктуу өнүктүрүү боюнча беш жылдык программаны бекитүүнү, ал эми 2027-жылы "Бишкек+25" Глобалдык саммитин уюштурууну сунуштаганбыз;
- Мөңгүлөрүбүз эрип, дарыялар жана тоолор экосистемасынын биологиялык ар түрдүүлүгү жоголуу коркунучуна кептелген шартта өзүбүз жалгыз туруштук бере абайбыз. Дүйнө коомчулугунун көмөгү керек;
- Сунуштарыбыз саммиттин чечимдерине камтылышын көздөйм. Бул багыттагы максаттуу программаларды ишке ашыруу үчүн БУУнун алдында атайын фонд түзүлсө деген мүдөөлөрүбүз — түпкү максатыбыз;
- Касиеттүү жерибизди, тоо-мөңгүлөрүбүздү, өзөн-сууларыбызды көздүн карегиндей сактап, келечек муунга татыктуу өткөрүп беришибиз керек.
