Кыргызстандын грек-рим күрөшүнүн балбаны Руслан Царев Сербиянын Белград шаарында өтүп жаткан жекелик Дүйнө кубогу мелдешинин коло байгесин утту. Кармаштын видеосун UWW уюму өзүнүн youtube каналына жарыялады.
72 килограмм салмакта ат салышкан Царев коло байге үчүн кармашта болгариялык Аик Мнацаканиянды 3:1 эсебинде утуп, Кыргызстандын капчыгына алгачкы медалды алып келди.
Кыргызстандык балбан 8/1 финалда венгриялык Балин Корпашиге жеңилген болчу. Венгер балбаны финалга чыкканына байланыштуу Царев коло байге үчүн күрөшүүгө мүмкүнчүлүк алган.
Руслан коло медаль үчүн күрөшкө чейин украиналык Максим Евтушенко менен кармашып, аны жеңген.
Эскерте кетсек, бул күнү Кыргызстандан Балбай Дордоков менен Халмурат Ибрагимов да өз салмактарында коло медаль үчүн күрөшүп жеңилип калды.
Ал эми 60 килограмм салмакта күч сынашып жаткан Жоламан Шаршенбеков финалга чыкты.
