Буурчактаган көз жаш, эрдин тиштеген Путин. Толгонайдын Кремлдеги монологу. Видео

Эске салсак, кишинин тула боюн дүркүрөтүп, толкунданткан бул номер Кыргызстан-Россиянын эриш-аркак жылынын ачылыш алкагындагы концертте аткарылды.

Россиянын эмгек сиңирген артисти Анна Большованын аткарганы залдагы алты миң адамды, алардын ичинде Кыргыз, Россия президенттерин ойго түрткөнүн видеодон көрүүгө болот.

Ал Кыргызстан президентинин YouTube каналына жарыяланды.

Алты жарым мүнөткө созулган Жер эне менен Толгонайдын сүйлөшүүсү кичинекей айылдагы бир адамдын тагдырынан ааламдык масштабдагы көйгөйдү камтыды. Согуштун апаат экени, пенденин насили, уруш эмнеге алып келери тууралуу баян дагы бир ирет денени "дүр" эттирди.

Айтматовдун "Саманчынын жолу" повести жалпы адам баласынын согушка каршы протестин, жеке бир тагдыр аркылуу Жер бетинде жашаган жалпы аялдардын трагедиясын, өлүм менен өлбөстүктүн кармашын көрсөткөн чыгарма. Окуя Улуу Ата Мекендик  согуштун кесепетин баяндайт.

Айтмакчы, чыгарма эң алгач дүйнөгө Москвадагы Станиславский атындагы драмалык театры аркылуу жайылган. 1964-жылы РСФСРдин эмгек сиңирген артисти Львов-Анохин инсценировкалап, аталган театрда койгон, бул спектакль менен труппа дүйнөнүн көптөгөн шаарларын кыдырган.

Каармандарды жамандык-жакшылыкта ар дайым коштоп турган табияттын бир көрүнүшү бул чыгармада – Саманчынын жолу жылдызы. Повесттин башкы каармандары дал ошол Саманчынын жолу жылдызы ааламдын бир четинен экинчи четине керилип жатканда жакшы тилек тилешет, алардын тилеги — "эл катары жер жыртып, эгин сээп, кырман бастыруу", "дыйкандын энчиси — сепкен эгининде". Жылдыздарга жакын жашаган кыргыздар ошол жылдыздарды сырдаш, муңдаш кылган, келечек тагдырын жылдыздар менен байланыштырган. Байыртадан түрк элдеринин жана кыргыздардын түшүнүгүндө асмандагы жылдыздар менен жердеги адамдардын түпкү насили бир болгон, жылдыздар – адамдар, алар жылдызга айланып кеткен пенде тукуму деген идея жашаган. Саманчынын жолунун асмандагы абалы — бул бүтүндөй адамдардын тагдыры, жаратылыштын абалы гана эмес, ал коомдун, мамлекеттин, жада калса, жалпы адамзаттын тагдыры менен байланышат, согуштун жүрүшү да тоолук кыргыз балдары үчүн жылдыздардын көрүнүшү менен айкалышат. Ошон үчүн чыгарма "Саманчынын жолу" деп аталган.