Борбор калаада автинспекторлордон качам деген 24 жаштагы жигит каза тапты. Бул туурасында маркумдун тууганы Алмаз Кадыров Sputnik Кыргызстан агенттигине билдирди.
Ал окуя 8-декабрда (болжол менен 1.50) болгонун айтып берди.
"Канат достору менен отурган. Алардын бири инимди сүйлөшкөн кызын үйүнө жеткирип коюуну сураныптыр. Жукеев-Пудовкин жана Токомбаев көчөлөрүнүн кесилишине Канаттын Mercedes автоунаасын автоинспекторлор тосуп, бирок токтобой өтүп кеткен. Милиция мындан соң күйүп-жанган атайын жарыгын күйгүзбөстөн эле инимди кууп жөнөгөн", — деди Кадыров.
Алмаз иниси коркуп кетип автокөлүктү буруп, катуу ылдамдык менен айдап, токтоп турган жолтандабаска урунганын билдирди. Аны Канат сол жагынан келип сүзгөн. Ал эми автоинспекторлордун айтымында, алар кырсык болгон жерден өтүп бара жатып, Токомбаев көчөсүндөгү жол чырактын кызыл күйгөнүн тоготпостон оңго бурган.
Mercedes рулунда отурган Канат ооруканага жеткирилип, саат жетиде эсине келбеген тейде көз жумган. Анын артында бир жаштагы уулу калды.
Ал эми салондогу кыз кырсыктан жабыркап, эсин жоготуп койгон. Анын колун сынган.
"Биз инспекторлор менен ишти алып барган Жол кыймылынын коопсуздугун камсыздоочу башкы башкармалыктын (ЖККББ) тергөөчүсү аркылуу байланышканга аракет кылдык. Алар Канаттын артынан куугандыгын, бирок жетпей калгандыгын, андыктан өздөрүн күнөөлүү деп эсептебей тургандыктарын айтышыптыр. Андан сырткары, биз менен сүйлөшө турган эч нерсе жоктугун кошумчалаптыр. Инимди акыркы жайга узатып жатканда да басып келишкен жок", — деп айтты Кадыров.
Жол кыймылынын коопсуздугун камсыздоочу башкы башкармалыктын маалымат кызматы Sputnik Кыргызстан агенттигинин кабарчысына автоинспекторлор жигиттин артынан куубагандыгын айтты. Маселенин чоо-жайын кечирээк маалымдай турганын убада кылышты.
Азыр материалдар прокуратуранын кароосунда турат.
Sputnik Кыргызстан окуянын мындан ары кандай өнүгөөрүнө көз салып турмакчы.
