Өлкө башчысы чакырылгандарды залкар жазуучу, гуманист, философ, планетардык инсан Чыңгыз Айтматовдун 90 жылдык мааракеси менен куттуктады. Президент өз сөзүндө улуу жазуучунун өзүнүн гана элесине арналган маараке эмес, жалпы элдик духтун, улуттук ар-намыстын, мекенчилдик сезимдин салтанаты экенин кошумчалады.
"Айтматов адамдардын аң-сезимин өзгөрткөн залкар жазуучу гана эмес, дүйнөлүк саясатка таасирин тийгизген планетардык инсан болуп калды! Ал адабияттын гана руханий кубулушу эмес, дүйнөлүк маданияттын феномени болду", — деди Жээнбеков.
Айтматовдун 90 жылдык мааракесине арналып Т.Сатылганов атындагы филармонияда өткөн "Айтматовдун аалам дүбүртү" аттуу иш-чарада жазуучунун бала чагы, атасы Төрөкул Айтматов менен болгон акыркы жолугушуусу, анын атылышы сахналаштырылып көрсөтүлдү.
