"Калыс-Ордодогу" 3,5 млн. долларлык мектептин асмандан көрүнүшү

Мектептин курулуш иштерине кытайлык ТВЕА компаниясы эки миллион доллар грант бөлгөн. Инвесторлор подрядчиктерди өздөрү тандап, сметасын түзүшкөн.

2015-жылдын 13-апрелинде "Дом мечты" деген бренд менен таанымал "Альто Групп" компаниясы менен келишим түзүлгөн. Алар мектепти төрт айда бүтүрөбүз деп убада берген. Документте каражаттын 50 пайызы алдын ала компанияга которулушу керектиги көрсөтүлгөндүктөн, ТВЕА 1 миллион долларды өзү түз которгон. Бирок бир жылдын ичинде иш жылган эмес. Анан соттошуп отуруп "Альто Группту" четтетишкен.

Кийин ТВЕА "Главстрой" деген дагы бир компанияны алып келген. Бул компания дагы материал алганга акча керек дегенде ТВЕА 288 миң 600 доллар которгон. Алар ишти 2016-жылдын 1-сентябрында бүтүрөбүз дешкен. Иш ойдогудай жүргөн эмес, бирок имараттын каркасы пайда болгон.

Жалпак тил менен айтканда "Альто Групп" менен "Главстрой" фундамент менен каркаска 1 миллион 288 миң 600 доллар сарптаган.

Үчүнчү "Айкөл Строй" аттуу компания курулуш ишин акырына чейин чыгарган. Бирок 2 миллиондон калган 759 миң доллар курулушка жетпей калгандыктан мэрия шаардык бюджеттен дагы 1,45 миллион доллар бөлгөн. Объект өткөн жылы эксплуатацияга берилген.

Редакция "Альто Групп" сарптаган 1 миллион доллар, "Главстрой" алган 288 миң 600 доллардын максаттуу же максатсыз сарпталганын ким эсептейт деген суроо менен түзүлгөн депутаттык комиссиянын мүчөсү Аида Касымалиевага кайрылды. Эл өкүлүнүн айтымында, тилекке каршы, кыргыз тарап чыгымдын эсебин ала албайт. Себеби келишимде кытай тарап куруучу компанияны өзү тандап, жабдыкка кеткен чыгымды өзү көзөмөлдөй турганы көрсөтүлүп калган.

Бирок Башкы прокуратура мектеп Кытай бөлгөн каражатка гана курулуп бүтүшү керек болчу деп эсептейт. Көзөмөл орган "Айкөл Строй" ишканасы курулуш ишин кытай компаниясы бөлгөн 700 миңдей долларга бүтүрбөстөн, мэриянын алдындагы Капиталдык курулуш башкармалыгы жана Финансы башкармалыгынын кызматкерлери менен жең ичинен сүйлөшүп алып, бюджеттен дагы кошумча каражат бөлдүрүп алган деген жүйө менен кылмыш ишин козгогон.