Сооронбай Жээнбеков Минск шаарында казак президенти Нурсултан Назарбаев менен жолугуп, эки мамлекеттин актуалдуу маселелери боюнча пикир алышып, бир чечимге келгенин билдирди.
Белгилей кетсек, Жээнбеков Минск шаарында Жамааттык коопсуздук келишими уюмунун кезектеги жыйынына катышуу үчүн келген.
Эки мамлекеттин президенттери жолуккандан кийин журналисттер үчүн билдирүү жасашты.
"Эки мамлекеттин өкмөтү түзгөн "жол картасы" бар. Эми эки өлкөнүн жумушчу топтору жолугуп ага кол коёт. "Кордай" көзөмөл өткөрүү пунктун убактылуу ачуу жана Казакстан тараптан да, Кырызстан тараптан дагы көзөмөл орнотуу боюнча чечим кабыл алынды. Ошондой эле ЕАЭБден үч киши жүктөрдү карап өткөрүп турат", — деди Назарбаев.
Назарбаев өз сөзүндө Жээнбековду расмий сапар менен Казакстанга чакырганын билдирди.
"Нурсултан Абишевич менен азыр болуп жаткан бардык көйгөйлөр боюнча сүйлөшүп, бир чечимге келдик. "Жол картасы" бар, эки мамлекеттин өкмөттөрү иш алып барууда. Декабрь айында бул багыт боюнча иштерди аяктайбыз. Чек арада казак тараптан да, кыргыз тараптан да, ошондой эле ЕАЭБ жактан да көзөмөл коёбуз. Эки тараптуу кызматташуунун бардык маселелери сүйлөшүлгөн мөөнөттүн ичинде чечилет", — деди Жээнбеков.
Белгилей кетсек, кыргыз-казак чек арасындагы абал 10-октябрдан тарта кыйындай баштаган. Чек арадагы көзөмөл пунктарында чакырымга жеткен кезек күтүүлөр пайда болгон. Расмий Астана мындай кадамды аткезчиликке каршы күрөшүү үчүн жасалып жаткан иш-чара менен байланыштырган.
