Sputnik Кыргызстан агенттиги окуянын чоо-жайын иликтеп көрдү.
Видеодо ыйлап жаткан Акжол Орозалиев 10 жашта. Ал бир туугандарынын улуусу, андан кийин 9 жаштагы карындашы жана 5 жашар иниси бар. Ата-энеси 11 жылдан бери Москвада иштеп жүргөн. Акжол бир жашынан тарта чоң энесинин колунда чоңойгон. Атасы Мамбетхалил Орозалиев өткөн жылдын июль айында жол кырсыгынан улам каза болуп калган.
Акжолдун чоң энеси Анвират Орозалиева баланын кетпейм деген оюна койбой күчкө салып алып кетишкенин айтат.
"Биринчи 11-августта келиним баланы алып кетүүгө келгенде кетпейм деп ыйлап туруп алган. Күч колдонуп унаага салып жатышканда коңшулар да кийлигишип алып калганбыз. Андан үч күн өткөндөн кийин милиция менен келип, анда да чыңырып барбайм дегенине карабай алып кетти", — деди чоң энеси.
Ал эми апасы Элия Таштутова баланы чоң энесинин колунан күчтөп алып кетүүгө мажбур болгонун билдирди.
"Жолдошум каза болгондон кийин кайын журтума барсам баламды көрсөтпөй, мени урушуп кубалап жатышты. Туугандарымды ээрчитип барып ыйласам да бербей коюшкан. Анан сотко кайрылууга мажбур болдум. Антпей балдарды катташтырып, каралашып турушса мага деле жакшы болмок да", — деди апасы.
Таштутова эгер чоң энеси баласы менен ээн-эркин жолуктуруп турганда мындай кадамга бармак эместигин айтат.
"Ага чейин Акжолдун мектебине барып жолугуп жакшы эле сүйлөшүп кайткам. Мен жөнүндө жаман сөздөрдү айтып баланын оюн башка нукка буруп салышыптыр. Чоң энеси "сен кетсең мен өлүп калам, апаң келгенде кетпейм деп ыйлагын" деп үйрөткөн экен. Балам келгенине эки күн болду, жакшы эле жүрөт", — деди Таштутова.
Ош ОИИБдин маалымат катчысы Жеңиш Ашырбаев сот баланы апасына берүү чечимин чыгарганын билдирди.
Ошондой эле ал бала каалаган учурда чоӊ энеси менен көрүшө аларын жана тиешелүү кызматтар анын жашоосунан кабар алып турарын кошумчалады.
Ал эми Жогорку соттун маалымат кызматынын билдирүүсүнө ылайык, аталган сот иши райондук, облустук жана жогорку соттон өтүп, натыйжада райондук соттун чечими күчүндө калтырылган.
Үй-бүлө жана баланы коргоо башкармалыгынын жетекчиси Жаңыл Жумабаева учурда бала апасы менен Кара-Суу районунун Сарай айылында жашап жатканын билдирди.
"Социалдык кызматкерлер Акжол жашап жаткан үйгө барып абал менен таанышып келишти. Анда ал апасы жана бир туугандары менен калгысы келгенин айткан. Чоң энеси ага "сен кетип калсаң мен өлүп калам" деп койгон экен. Анан да чоочун кишилер, милиционерлер барса корконунан да ыйлап кетпейм дептир. Бала жашап жаткан үйдө жакшы шарттар каралган", — деди Жумабаева.
Ошол эле учурда күчкө салып алып кетүү туура эмес болгонун белгилеп, алдын ала бала менен сүйлөшүп өзү көнгөндөн кийин гана алып кетүү керек болчу деген пикирин билдирди.
