Биздин бүгүнкү маектештер — "Бишкек" командасынын башкы чабуулчусу сегиз жашар Нуртемир Сулайманов жана аталган команданын машыктыруучусу Ринат Мустафаев болду.
Биздин кичинекей спорчуларыбыз — "Бишкек" командасы атаандашы болгон "Грозный" командасын 11:4 эсебинде жеңип алды. Ал эми башка атаандаштарынын бир катарлары менен тең чыкса, бирөөсүнө бир гана гол менен алдырды.
Бүгүнкү каарманыбыз Нуртемирди ата-энеси музга 3,5 жашында алып келиптир. Азыр сегизде. Күнүнө жок дегенде хоккей менен машыгууга 1,5 саат убактысын жумшайт экен.
"Алгач бир аз кыйналды. Таң эртең менен таттуу уйкуда жаткан 3-4 жашар баланы ойготуп, кийинтип, машыгууга алып барыш… өзүңүздөр элестетип жатсаңыздар керек. Кийинчирээк акырындап көнө баштады. Азыр кудайга шүгүр, жыйынтыктарыбыз жаман эмес", — деди Нуртемирдин атасы Алтынбек Сулайманов.
"Бишкек" хоккей клубунун машыктыруучусу Ренат Мустафаев команда жана Нуртемир жөнүндө төмөнкүлөрдү айтып берди.
Төрт жарым жыл Нуртемирди хоккей менен бир топ ынак кылып койгон. Азыр ар бир күнү машыгууга айныбай барат экен.
Аны Бишкек шаарындагы ири муз аянтындагы машыгуудан кийин алып кетип баратабыз. Болочоктогу хоккейчиге азыр эмне кылганды каалайт элең деген сурообузга "машыгууга баргым келип жатат", — дейт жылмайып.
Машыгуу демекчи, балдар турнир алдында дээрлик күндүн бардык бөлүгүн муз аянтчасында өткөрүп каларын Мустафаев айтып берди.
"Балдар бул жерде жумасына орто эсеп менен тогуз сааттан машыгат. Турнир алдында шаардык муз аянтында жашагандай эле болуп калабыз, машыгууга абдан көп убакыт жумшайбыз", — деди ал.
Нуртемирдин оюнга, муз аянтына чыккандагы өздүк номери — 8 экен. Айтмакчы, кумири россиялык атактуу спортчу — Александр Овечкин.
Биздин каарман Бишкек шаарындагы №61 мектеп-гимназиясында окуйт, андан сырткары англис тили үйрөнүп жатат. Айтмакчы, шахмат Нуртемирдин хоккейден кийинки сүйүктүү оюну.
Болочоктогу хоккейчи өзүнүн командасы жана сүйүктүү машыктыруучусу менен жакында Казакстандагы кезектеги турнирге даярданып жатат. Демек, алдыда кайрадан машыгуу жана машыгуу.
