БИШКЕК, 12-фев. — Sputnik. Кыргызстандык чемпион Валентина Шевченко Хьюстондо (АКШ, Техас штаты) өткөн UFC 247 турниринин жеңүүчүсү болгондон кийин UFC уюмунун испан бөлүмүнө интервью берди. Спортчу суроолорго жооп берип жаткан кезде анын сөзүн Голливуд жылдызы, "Оскар" сыйлыгынын лауреаты Холли Берри бөлгөн.
Турнирге келгендердин көбү Шевченко менен Берринин ортосунда жылуу мамиле түзүлгөнүн байкашкан. Бул жаңылык бардык дүйнөлүк маалымат каражаттарына тарап, алдыңкы гезиттерге чейин чыкты.
Посмотреть эту публикацию в Instagram
Америкалык белгилүү актриса UFC 247 турнирине Шевченкону колдош үчүн келип, кыргызстандык спортчунун машыктыруучу штабынын артында отурду.
Посмотреть эту публикацию в Instagram
"Холли Берри абдан жакшы адам. Бүгүн бул жерге келгенине абдан кубанып турам. Ал беттеш алдында мага келип ийгилик каалады. Бул өзгөчө учур болду... Мындай нерселер адамды шыктандырат", — деп турнирден кийинки маалымат жыйында Шевченко билдирди.
Журналисттердин "чачыңызды эмнеге боёп салдыңыз" деген суроосуна Валентина "В синяках" (Bruised) тасмасына катышып жаткандыгы менен түшүндүргөн.
Bloody Elbow басылмасы жазганына караганда, тасма Жеки (анын ролун Холли Берри аткарат) аттуу ММА мушкери тууралуу тартылган. Сценарий боюнча аял негизги беттештен жеңилип калып, карьерасы артка кетет. Мушкер "жашоодо колуман мушташтан башка эч нерсе келбейт" деп эсептеп жүрөт.
Сызга отуруп калган Жеки карьерасы үчүн карабай кеткен алты жаштагы баласы менен мамилесин оңдоону чечет. Бирок ринг менен жеңишти эңсеп, жан дүйнөсүнө тынчтык орнобой коёт. Бир күнү жаш жылдыздардын бири менен беттешүүгө мүмкүнчүлүк жаралат, Жеки каршылашы өзүнөн күчтүү экенине карабай макул болот.
Аралаш мушташтын жылдызы, Жекинин башкы атаандашынын ролун Валентина Шевченко ойнойт.
"Тасманын мен катышкан бөлүгү аяктап калды. Учурда башка эпизоддор тартылып жатат", — деди Шевченко ESPN MMA басылмасына маек берип жатып.
The person to thank for @BulletValentina's new red hair: @halleberry 👩🦰 (via @arielhelwani) pic.twitter.com/uaWA4EG7Ue
— ESPN MMA (@espnmma) December 2, 2019
South China Morning Post гезитинин жазганы боюнча, тасмага Бразилиянын жиу-житсу боюнча эл аралык федерациясынын мүчөсү Габриель Лемос менен UFC уюмунун бразилиялык мушкери Аманда Нуньес дагы катышат.
Кинолордун IMDb маалымат базасындагы маалыматка караганда, актёрлордун негизги курамын АКШ, Канада жана Мексиканын өкүлдөрү түзгөн.
Тасма жыл аягына чейин экранга чыгары күтүлүүдө.
