Sputnik Кыргызстан агенттиги Көчмөндөрдүн дүйнөлүк III оюндарын даярдоо жана өткөрүү боюнча катчылыгы, Жаштар иши, дене тарбия жана спорт агенттиги менен биргеликте спортчулар күч сынашчу мелдеш түрлөрүнүн эрежелерин даярдоодо. Бул ирет алыскы аралыкка ат чабыш менен тааныштырабыз.
Жалпы жобо
Чет элдик команданын курамында 4 аргымак, 4 чабандес, 4 машыктыруучу, 1 ветеринар, 1 өкүл болот.
Кыргызстандын командасынын курамында — 5 аргымак, 5 чабандес, 5 машыктыруучу, 1 ветеринар, 1 өкүл болот.
Көчмөндөр оюндарында алыскы аралыкка ат чабууга катышкан аргымактар 80 чакырым чуркайт. Негизи эл аралык стандартта 40тан 120 чакырымга чейин өтүп келет.
Катышуучуларга талаптар
— Чабандестер Эл аралык аргымак федерациясынын (FEI) маалымат базасында катталуу болушу керек;
— Чабандести жана бардык жабдууларды кошкондо аттын көтөргөн жүгүнүн салмагы 75 килограммдан кем болбошу шарт;
— Аттар улуттук паспортко (Кыргызстанда гана жарактуу) жана FEI пасторуна ээ болушу зарыл;
— Жарышка катышуу үчүн улуттук федерацияга табыштама жиберет;
— Аргымактар 6 жаштан кем эмес болушу зарыл.
Дүйнөлүк көчмөндөрдүн III оюндары 2018-жылдын 2-сентябрында Чолпон-Ата шаарындагы ат майданда башталат. Мелдештин курамына спорттун 37 түрү кирип, 79 өлкөнүн 2300 спортчусу күч сынашмай болду. Спорттун түрлөрүнө 15 мамлекеттин улуттук оюндары киргизилген.
