БИШКЕК, 17-янв. — Sputnik. Кыргызстандык мушкер Кылычбек Садирдинов Чеченстандын "Ахмат" клубунун WFCA (World fighting championship Akhmat — ред.) лигасынын турниринде күч сынашат. Бул тууралуу маалыматты спортчу өзү билдирди.
Аталган турнир 24-февралда Чеченстандын борбору Грозный шаарында өтөт. Анда Садирдинов жергиликтүү мушкер Анзор Абдулхожаев менен беттешет.
Кыргызстандык мушкер Москвадагы "Айкөл-Манас" спорттук клубунунун тарбиялануучусу. Машыктыруучусу — Нургазы Амиракулов.
2016-жылы Владивостокто өткөн кармашып урушуу боюнча чемпионатта алтын медаль, 2017-жылы уруш түрүндөгү самбо боюнча дүйнө чемпионатында күмүш медаль тагынган. Панкратион боюнча дүйнө кубогунда чемпион. Аталган спорт түрлөрү боюнча спорт чебери.
ММА боюнча бир нече профессионалдуу беттештин жеңүүчүсү.
