БИШКЕК, 3-окт. — Sputnik. Бишкек шаарында мини-футбол боюнча ардагерлердин мелдеши өтөрүн уюштуруучулар билдирди.
Спорттук бул иш-чара Кыргызстандагы мини-футбол ассоциациясынын негиздөөчүсү жана жетекчиси Медетбек Букуевдин 60 жылдыгына арналган. Ал 4-7-октябрда Улуттук университеттин спорттук аянтчаларында өтөт. Анда элүүнүн кырын ашкан мурдагы оюнчулар күч сынашат.
Букуев көп жылдар бою Кыргыз мамлекеттик университетинин футбол жана гандбол кафедрасын жетектеп келген.
Ал 1995-жылы мини-футбол ассоциациясын ачууну демилгелеп, аны бүгүнкү күнгө чейин жетектеп келет.
Букуев 5 монография, 50дөн ашык публицистикалык эмгектердин автору болуп саналат.
Анын жетекчилиги менен түзүлгөн футзал боюнча КР курама командасы 1999-жылы биринчи жолу Малайзияда өткөн Азия чемпионатына катышкан.
