БИШКЕК, 28-июл. — Sputnik. Коронавирус менен ооруган бир бейтапты 14 күн дарылоо үчүн миң долларга чейин каражат сарпталууда. Бул тууралуу мамлекет башчы Садыр Жапаров социалдык тармак аркылуу билдирип, кыргызстандыктарды вакцина алууга чакырды.
"Акыркы күндөрү ооруканага түшкөндөрдүн 100 пайызы вакцина албагандар болуп жатат. Бюджетибиз ансыз да эңшерилип турганда ого бетер оорчулук жаралууда. Жалпысынан 20 миллион долларга жакын каражатка вакцина алып келип жатабыз. Андан тышкары, бир бейтапты 14 күн дарылоо үчүн миң долларга чейин каражат сарпталууда", — деген Жапаров.
Мамлекет башчы эмдөөдөн өтпөгөндөр өзүнө эле эмес, жакындарына, кошуналарына жана мамлекетке чоң зыян келтирип жатканын кошумчалап, элден вакцина алууну суранган.
