БИШКЕК, 27-июл. — Sputnik. Президент Сооронбай Жээнбеков "30-июлду Улуттук аза күтүү күнү деп жарыялоо жөнүндө" Жарлыкка кол койду. Бул туурасында мамлекет башчынын маалымат кызматынан кабарлашты.
"Кыргыз Республикасында коронавирус инфекциясы жайыла баштаган учурдан тартып көптөгөн мекендештерибиз илдеттен каза тапты. Бул Кыргызстандын эли үчүн оор жоготуу болду", - деп жазылган маалыматта.
30-июль - Улуттук аза күтүү күнүндө Кыргызстандын бүткүл аймагында, ошондой эле чет өлкөдөгү дипломатиялык жана консулдук өкүлчүлүктөрдүн имараттарында Кыргыз Республикасынын мамлекеттик туулары ылдый түшүрүлөт.
Коронавирусту дарылоонун жаңы протоколу чыгат. Боронов президент менен сүйлөштү
Кыргызстандын маданият мекемелеринде жана телерадиокомпанияларында аза күтүү күнү оюн-зоок иш-чаралары жана берүүлөр токтотулат.
2020-жылдын 11-мартында Дүйнөлүк саламаттык сактоо уюму жаңы COVID-19 инфекциясынын жайылышын пандемия деп жарыялады.
Өткөн суткада коронавирус 24 кишинин өмүрүн алды. Ушуну менен марттан бери COVID-19дан каза тапкандардын саны 1 301ге жетти. Ал эми коронавирусту 21 205 адам жеңди.
