Апама дары алам. Ошто кайырчылык кылган балага милиционерлер жардам беришти

© Фото / пресс-служба Ош ГУВДПомощь ребенку, просившему милостыню в Оше
Помощь ребенку, просившему милостыню в Оше - Sputnik Кыргызстан
Жазылуу
12 жаштагы тестиер апасына 7 000 сомдук дары алып, кичинекей инисин багуу үчүн кайыр сураганга аргасыз болгон.

БИШКЕК, 24-июл. — Sputnik. Ош шаарында Ак-Буура милиция бөлүмүнүн кызматкерлери оорукчан апасына дары алуу үчүн тилемчилик кылып жүргөн балага жардам беришти. Бул тууралуу шаардык милициянын маалымат кызматы кабарлады. 

Билдирмеге караганда, аталган бөлүмдүн өспүрүмдөр менен иштөө инспекциясы 22-июль күнү көчөдө кайыр сурап жүргөн 12 жаштагы баланы кармаган. Анда ал оорукчан апасы үчүн дарыга акча топтоп жатканын айткан. Кызматкерлер жашаган жерин тактаган соң аны Кара-Суу райондук милицияга өткөрүп беришкен.

“Баланын зиректиги, апасына камкордугу милиция кызматкерлери сүйлөшкөндө байкалган. 23-июлда Ак-Буура милиция бөлүмүнүн өспүрүмдөр менен иштөө инспекциясынын кызматкерлери анын жашоо шарты менен таанышып келди. Ижарага алып жашаган үйү аябай эски, шарты жок. Апасы чындыгында оорукчан, иштегенге дармансыз экени аныкталды. Апасынын ден соолугуна байланыштуу врачтар 7 миң сомдук дары жазып берген. Баласы ошол акчаны топтоо үчүн тилемчилик кылганы чын болуп чыкты”, — деп айтылат маалыматта.

Мындан улам инспекторлор бул үй-бүлөгө жардам берүүнү чечишкен.

Жүрөк жылытат. Карыяга акча чогулткандар медиктерге да жардам берди

“Ошол эле күнү кечинде балага жана анын 5 жашар инисине таттуу, ал эми апасына дарыгер жазып берген дары-дармекти алып барышкан. Азык-түлүк үчүн 5 миң сом акчалай түрүндө беришти. Баланын атасы каза болгондон кийин келинин кайын журту үйдөн чыгарып коюптур. Биз берген каражат түгөнгөндөн кийин ал апасын жана инисин багуу үчүн кайрадан эле көчөгө чыгышы мүмкүн. Буларга такай колдоо керек экен”, — дешти милициядан.

Бул үй-бүлө жөнөкөй кийим-кечектен тартып азык-түлүккө дагы муктаж экени айтылат. Кимде ким жардам көрсөтүүнү кааласа милициянын лейтенанты Айчүрөк Артыковага 0999-69-99-69 номери аркылуу кайрылып, үй-бүлө тууралуу маалымат алса болот. Ал эми баланын апасынын номери: 0222-75-96-46.

Жаңылыктар түрмөгү
0