БИШКЕК, 5-июл. — Sputnik. Түркияда иштеп жүргөн мекендештердин "Кыргызстан — достук жана маданият" коому Стамбулдан 15 кычкылтек концентраторун алып, мекенине салып жиберишти. Бул тууралуу Sputnik Кыргызстанга аталган коомдун мүчөсү Нурланбек Усубакун уулу билдирди.
Ал жардамдын алгачкы партиясы гана жөнөтүлгөнүн, учурда дагы акча чогулуп жатканын айтат.
"Бул жакта Кыргызстандагы учуп жүргөн кушубуз дагы өлбөсүн деп тилек кылабыз. Бардыгын "Кыргызстан — достук жана маданият" коомунун төрагасы Айбек Сарыгулов демилгелеп уюштуруп жатат. Ага коомдун мүчөлөрү 2000, 1000, 500, 100 доллардан берип, 15 кычкылтек концентраторун алып, кечээ, 4-июлда, учакка жүктөдүк. Буюрса, бүгүн Бишкекке жетип калат. Бул алгачкы партиясы, учурда дагы каражат жыйналууда. Этап-этабы менен жөнөтүп, 100 аппарат алып берүүнү пландап жатабыз", — деди Нурланбек Усубакун.
Бир суткада 23 адам пневмониядан каза болуп, жалпы саны 120га жетти
Белгилей кетсек, Бишкек менен Чүй облусунда эпидемиологиялык кырдаал оорлошуп, өпкөсү сезгенип ооруканага кайрылган жарандар көп болууда. Мындан улам медициналык жабдуулар, дарыгерлер жетишпей жатат. Интернат, мейманкана жана спорт залдарга оорукана уюштурулуп, бейтаптарды кабыл алууда.
Кыргызстандагы коронавирус боюнча кырдаал
Өлкө боюнча COVID илештирип алгандардын жалпы саны 7094. Анын 2714ү айыгып, тилекке каршы, 78 киши көз жумду.
Коронавирустун кесепетинен келип чыккан пневмония оорусуна март айынан бери 3009 адам чалдыкты. Бүгүнкү күндө анын 736сы айыгып чыкты. Ал эми 496 адамдын абалы оор, 153 бейтап жандандыруу бөлүмүндө жатат.
Боронов: Россияда иштеген кыргыз дарыгерлер жардамга даяр, учак менен алып келебиз
Өлкө аймагындагы соңку кабарлар менен биздин Telegram-каналдан таанышып туруңуз.
