Sputnik Кыргызстан агенттиги өкмөт башчылыкка аттанган Боронов тууралуу фактыларды сунуштайт.
Алайдын кулуну
Кубатбек Боронов 1964-жылы 15-декабрда Ош облусунун Өзгөн районунун Зергер айылында туулган. Бирок ата-энесинин түпкү теги Алай районунан, мындан улам 4-классында Алайга көчүп кетип, окууну ошол жактан аяктаган. Атасы совхоздун жетекчиси болгондуктан, Боронов окуучулук кезинен эле тоют цехинде иштеп, таңгак чөптөрдү ташып, уйга, койго чөп салып иштегенин буга чейин маек берип жатып айткан эле. Армияда да кызмат өтөгөн.
Куруучулук иши жана бизнеси
Кесиби боюнча инженер-куруучу. 1991-жылы Фрунзе политехникалык институтунун Айыл чарба курулуш факультетин аяктап, эмгек жолун "Фрунзекурулуштун" СМУ-9 трестинде таш тизгич болуп баштаган. Кийин жыгач иштетүүчү заводдун жетекчилигине чейин жеткен. Бирок СССР ураганда жумуш токтоп, бизнеске өтүп кеткен. Достору менен пахта сатуучу чакан ишкана ачып, беш жыл иштеткен.
Ээрге бекем отурган аткаминер
Өзгөчө кырдаалдар министрлигине 2005-жылы Жарандык коргонуунун шаардык башкармалыгынын жетекчисинин орун басары болуп келген. Мекемедеги реформадан кийин ал кызмат жоюлуп, аймактар аралык башкармалыгында жетекчинин орун басары болуп калган. Улам бир тепкичке көтөрүлүп отуруп, 2011-жылдын декабрь айынан тарта аталган министрликтин эки тизгин, бир чылбырын колго алган. Министр болуп жети жылдай иштеди.
2018-жылдын апрель айында Мухаммедкалый Абылгазиевдин өкмөтү менен келип, биринчи-вице-премьерликке дайындалган. Ал өкмөттүн курамы алмашып отуруп, бүгүнкү күндө "эскилерден" ички иштер министри Кашкар Жунушалиев экөө эле калган.
Матараимовдор иш-чарасы, эшек окуясы
Биринчи вице-премьер кезинде бир тууган Матраимовдордун Кара-Суудагы иш-чарасына барганы коомчулук тарабынан катуу сынга алынган. Себеби ошол учурда Райым Матраимов кызматтан мыйзамсыз алынганын айтып, өкмөт менен соттошуп жаткан эле.
Бороновдун "айылдагы той-аштарга мурда ат, эшек менен келишчү. Азыр эшек минген бирөөнү дагы көрбөйсүң, баары автоунаада жүрөт. Калктын жашоо-турумушу оңолуп жатканын ушундай байкасак болот" деп айткан сөзү да көпчүлүктү таң калтырган. "Элдин жашоо шартынын индекси эшек менен бааланабы?" деп күлгөндөр болгон.
Ата-эне, бир туугандары
Атасы Айылчы Боронов 2018-жылы ноябрда 83 жаш курагында дүйнө салган. Апасы учурда 84 жашта. Министр өзү 8 бир тууган. Улуу агасы кырсыктап 2013-жылы көз жумган. Калгандары ар түрдүү тармакта иштеп келишет.
Үй-бүлөсү
Бир кыз, бир уулдун атасы. Баласы Эркин Боронов учурда Жогорку Кеңеште депутаттын жардамчысы болуп иштейт. Келини ЖКнын V чакырылышынын депутаты Замирбек Алымбековдун кызы. Ал эми өзүнүн кызы борбор калаадагы мектептердин биринде быйыл 6-классты аяктады.
Мүнөзү
ӨКМ кызматкерлеринин айтымында, Боронов жөнөкөй, карапайым адам. Ал ар бир кызматкерге бир тууганындай мамиле кылып, жыйналыштарда кокус катуу айтып алса, кайра ошол адамдын өзүн чакырып себебин түшүндүрчү экен. Түнкү саат 12лерге чейин жыйналыш өткөрүп, жаратылыш кырсыктарында дайыма катардагы кызматкерлеринин жанында жүрчү.
