БИШКЕК, 15-ноя. — Sputnik. Жалал-Абад облусунун Кочкор-Ата шаардык ооруканасынын Балдар психоневрологиялык бөлүмүнө келген ата-энелер балдары менен сууктун күнү тепкичте кезек күтүүгө аргасыз болууда. Мындай маалыматты Facebook тамагынын колдонуучусу Данияр Дурусбеков өзүнүн баракчасына жарыялады.
"21-кылым, санариптештирүү жылы, таңкы саат 4.45тен баштап кезек күтмөй... Кочкор-Ата шаарынын балдар психоневрологиялык бөлүмүндөгү бир көрүнүш. Сызда 3-4 саат күтүп олтурган энелерди көрүп, аялдар колониясын элестетесиң. Отурганга орун жок, ооруп келгендер ого бетер чала жан болуп кетет экен", — деп жазды ал.
Sputnik Данияр Дурусбековдун өзү менен байлагышып, окуя бүгүн, 15-ноябрь күнү, таңкы саат 5те болгонун аныктады.
"Ооруканада бир гана балдар неврологу бар. Ал мыкты адис болгондуктан, келгендер көп. Оорукана болгону үчүн сырттан келгендер ичине кире албайт. Кезегин сыртта күтүүгө аргасыз. Бирок кезек күткөн атайын жер жок, 30дан ашык оорулуу тепкичте, батпагандары сыртта машиналарында жылынып отурушат", — деди ал.
Мындан тышкары, ал дарыгерге кирем дегендер түнкү саат бирден баштап кезекке жазыларын, атургай айрымдары ушул жерде түнөп каларын кошумчалады. Колдонуучу оорулууларга кезек күтүүгө ыңгайлуу шарт түзүлбөгөнүнө нааразы болууда.
Дурусбеков жүктөгөн сүрөттөрдө чындап эле тепкичте балдарын кучактап отурган ата-энелерди көрүүгө болот. Арасында оролгон ымыркайлар дагы бар.
Саламаттык сактоо министрлигинин маалымат кызматы учурда кырдаал такталып жатканын, кийинчерээк кененирээк маалымат берилерин билдирди.
