БИШКЕК, 26-авг. — Sputnik. Жол кырсыгына кабылып, алган жаракатынан каза болгон Дастан Мусталиевдин сөөгү Ысык-Көл облусундагы Түп районунун Кең-Суу айылына 28-августта саат 11:00дө коюлат. Бул тууралуу Садыр Жапаровдун адвокаты Шарабидин Токтосунов билдирди.
Белгилей кетсек, Дастан 22-августта мотоцикл менен бара жатып жол кырсыгына учурап, төрт күндөн кийин эсине келбей Бишкек травматология жана ортопедия илим изилдөө борборунун реанимация бөлүмүндө көз жумган.
Токтосунов ошондой эле Садыр Жапаровду баласына топурак салуу үчүн убактылуу коё берүү үчүн Жаза аткаруу мамлекеттик кызматынын башчысына жана президент Сооронбай Жээнбековго расмий кайрылганын, азырынча жооп боло электигин кошумчалады.
