БИШКЕК, 26-авг. — Sputnik. Мурдагы депутат Садыр Жапаровдун каза болгон уулу Дастан Мусталиев Silk Road International School мектебинде окуп, КРСУда билим алган. Бул тууралуу ал Facebook тармагындагы баракчасына жазган.
Белгилей кетсек, Дастан 22-августта мотоцикл менен бара жатып жол кырсыгына учурап, төрт күндөн кийин эсине келбей Бишкек травматология жана ортопедия илим изилдөө борборунун реанимация бөлүмүндө көз жумган.
Дастан Мусталиев 26 жашта болчу. Төрт бир тууган. Үйдүн улуусу. Рустам, Нурдөөлөт аттуу инилери жана Жанайым деген карындашы бар. Улуттук гвардиянын "Эдельвейс" аскер бөлүгүндө кызмат өтөгөнүн гезиттердин бирине берген маегинде айткан. Андан сырткары, бир туугандары Рустам Польшадан билим алганын, Нурдөөлөт менен Жанайым Түркияда окуганын да билдирген.
Эске салсак, Дастандын атасы Садыр Жапаров учурда Молдовановка айылындагы биринчи колонияда жазасын өтөп жатат. Экс-депутат "2013-жылы октябрда Кумтөр маселесине байланыштуу Караколдо болгон митингде ошол кездеги Ысык-Көлдүн губернатору Эмилбек Каптагаевди барымтага алууну уюштурган" деп айыпталып, 11 жыл 6 айга кесилген.
