БИШКЕК, 10-май — Sputnik. Жалал-Абаддагы мунай базадан чыккан өрт саат 17.25те чектөөгө алынды. Бул туурасында Өзгөчө кырдаалдар министрлигинен билдиришти.
Өрт өчүрүүчүлөр тилсиз жоо менен жети сааттан ашык убакыт кармашып жалынды чектегени айтылат. Азыркы тапта өрттү толугу менен өчүрүү иш-аракети жүрүп жатат.
Белгилей кетсек, мунай базадагы өрт бүгүн, 10-майда, саат 10:00дөр чамасында чыккан. Жеринде 10 өрт өчүрүүчү унаа, 2 автошаты жана Жалал-Абад аэропортунун 2 техникасы менен иш алып барышууда. Мындан сырткары, Ош облусунан дагы кошумча өрт өчүрүү бөлүмү тартылып, көбүк алынганы кабарланган.
Кырсыктын кесепетинен бир өрт өчүрүүчү жана мунай базанын кызматкери жаракат алып ооруканага жеткирилген. Тегерек четинде жашаган эки миңдей тургун эвакуацияланды. Мунай базасы "Томас и Ко" компаниясына таандык. Анын жетекчилеринин бири саясатчы Камчыбек Ташиевдин бир тууганы Казыбек Ташиев экени белгилүү болду.
