БИШКЕК, 4-апр. — Sputnik. Президент Сооронбай Жээнбеков Бишкек шаарындагы перинаталдык борбордо төрт эм төрөгөн Нурайым Рысмат кызына акчалай каражат жана эки орундуу эки коляска белекке берди. Бул тууралуу өлкө башчынын маалымат кызматынан кабарлашты.
Билдирмеге караганда, белектерди Жээнбековдун атынан президенттин аппарат жетекчисинин биринчи орун басары Алмаз Кененбаев тапшырды.
"Мамлекет башчынын атынан жаш үй-бүлөгө турак жай алуу үчүн 2 миллион сомго сертификат жана эки орундуу эки коляска берилди. Мындан сырткары, өкмөт тарабынан үй-бүлөнүн муктаждыгына деп 150 миң сом бөлүндү", — деп айтылат маалыматта.
Эске салсак, 2019-жылдын 25-февралында Бишкек шаардык перинаталдык борбордо Азамат Сманов жана Нурайым Рысмат кызы төрт эмдүү болушкан. Ымыркайлардын үчөө кыз, бирөө уул. Жубайлар үч жылдан бери Бишкекте батирде жашап келишет.
