БИШКЕК, 1-авг. — Sputnik. Россиянын Сахалин аралында 17 жаштагы кыргызстандык жигит суудагы кызды куткарууга аракет жасап өзү чөгүп кетти. Бул маалыматты Сахалиндеги кыргыздардын "Биримдик" диаспорасынын төрагасы Эшимбет Толбаев тастыктады.
Анын айтымында, окуя 29-июлда "Тёплое озеро" деп аталган көлдө түштөн кийин саат 15.35тер чамасында болгон. Ал күнү куткаруучулар жигитти издеп таба албай, эртеси саат 11.40да сөөгүн алып чыгышкан.
"Сууга чөгүп кеткен улан россиялык кызды куткарам деп барып өзү чыга албай калган. Ал жээктен 60 метрдей ары барган экен. Суу көкөрөгүнөн келип турган, андан ары басканда чөгүп кетиптир. Байкуш бала ал жагынын тереңдиги 2,5 метр экенин билген эмес. Суу муздак болгондуктан тарамышы ошол жерде түйүлүп калыптыр. Мындан улам ал кызга жетпей өзү чөгүп кетет. Бирок башкалар барып кызды аман алып калып, жигитти куткара албай калышыптыр. Эртеси ӨКМдин суучуларды менен өзүм кошо барып, эки саатка чукул издеп сөөгүн таптык", — деди Толбаев.
Каза болгон жигит Ош облусунун Кара-Кулжа районунда туулган. Сахалинге жайкы каникулга барып, августтун аягында кайра кайтам деп жүргөн.
Кыргызстандык жарандын сөөгү бүгүн эртең менен мекенине жиберилген.
