БИШКЕК, 7-июн. — Sputnik. Бишкектеги №220 каттамдагы маршрутканын айдоочусу түнкү саат 12.00дөн кийин жол кирени 20 сомго көтөрүп алган. Бул туурасында Sputnik Кыргызстан агенттигине күбө билдирди.
Ал айдоочудан эмнеге жол кирени көтөрүп алганын сураганда "сага жакпаса түшүп кет" деген жооп алганын айтат. Окуя 7-июнга караган түнү болгон.
"Досторум менен маршруткага түшсөк "саат 12ден кийин жол кире 20 сом" деп алып жатты. Аны төлөгөндөн кийин кайра барып эмнеге бааны көтөрүп алганын сурасак түшүндүрүп бере алган жок. Анын ордуна "мээни чакпай түшүп калчы! Бар, каалаган жериңе арыздан!" деп кыйкырды. Ал эми маршрутканын кайсы фирмага таандык экенине кызыкканыбызда "Ак-Жолтой" фирмасына баргыла" деди. Түндөсү бааны көтөрүп алса боло береби? Күндүзү бизди картошка жүктөгөндөй тыгып алганда кыйналдык, жол кирени арзандат дебейбиз го", — деп нааразы болду күбө.
Ошондой эле ал андан түшүп №100 каттамдагы маршруткага отурса маселе болбогонун, тескерисинче 13 сом сунса, бир сомун кайтарып бергенин кошумчалады.
Маршруттук таксинин айдоочулары өзү иштеген фирмага, мамлекетке кандай суммада акча төлөп жана канча киреше таап жатканы туурасында Sputnik Кыргызстан агенттигинин материалынан окуңуздар.
