БИШКЕК, 10-май — Sputnik. Жогорку Кеңештин жалпы жыйынында депутат Рыскелди Момбеков Бишкек ТЭЦине сатып алынган 600 долларлык аттиштерди көрсөтүүнү талап кылды. ТЭЦтин директору Андрей Воропаев трибунадан туруп аттиштерди жалпы депутаттарга көрсөттү.
Воропаев мындай аттиштен эки комплекти алынганын билдирип өттү. Ал эми эл өкүлү Кожобек Рыспаев жыйында отурган ТЭЦтин мурдагы директору Нурлан Өмүркул уулунан "ушул аттиштер беле?" деп сураганда, Өмүркул уулу ал эмес экенин айтты.
"Бул жерде комплектиге конвейердик лента да кошулуп калган. Бухгалтерлер жакшы түшүнөт, отчет үчүн ар бир алынган жабдык өзүнчө эсептелет. Тагыраагы, аттиш өзүнчө, башкасы да өзүнчө жазылат. Бирок булар коомчулукта резонанс жаралганда, аттиштин баасы 640 долларга жетпей калбасын деп конвейердик лентаны кошо салышты. Аттиш менен лента кантип чогуу эсептелсин? А чынында башында темир кескен аттиш гана болчу. Булар силерди алдап жатат", — деди Өмүркул уулу.
Анын мындай кебине депутаттар кол чаап жиберишти.
Белгилей кетсек, Нурлан Өмүркул уулу буга чейин да мекемени модернизациялоодо жабдуулар кымбат сатып алынганын айтып чыккан. Коомчулук болсо "640 долларлык да аттиш болобу" деп ызы-чууга түшкөн.
