БИШКЕК, 19-мар. — Sputnik. Кыргызстандын өлкө башчысы Сооронбай Жээнбеков Владимир Путинди Россиянын президенти болуп шайланышы менен куттуктап, телеграмма жолдоду. Бул тууралуу мамлекет жетекчисинин маалымат кызматынан билдиришти.
"Сиздин жеңишиңиз элиңиздин сизге жана мамлекетти өнүктүрүүдө тандаган саясий багытыңызга ишенимин далилдеп турат. Кыргызстан менен Россиянын ортосундагы достук жана стратегиялык өнөктөштүктүн жогорку деңгээлде экенин канааттануу менен баса белгилегим келет. Мындан ары дагы ушул нукта кызматташабыз деп ишенем", — деп жазылат куттуктоодо.
Мындан тышкары, Жээнбеков Владимир Путинге бекем ден соолук, жоопкерчиликтүү ишине ийгилик жана орус элине бакубат турмуш каалады.
