БИШКЕК, 1-мар. — Sputnik. Мамлекеттик салык кызматы 1-апрелге чейин жеке жактар былтыркы кирешелери боюнча декларациясын тапшырышы керектигин эскертет.
Жарандар жер тилкелери, кыймылсыз, кыймылдуу мүлктөрү, экономикалык ишмердиги жөнүндө салык органдарына отчет бериши кажет.
"Аталган мөөнөткө чейин мамлекеттик жана муниципалдык кызматкерлер, жеке ишкерлер, анын ичинде патенттик негизде салык төлөгөндөр, менчигинде кыймылдуу (транспорт) жана кыймылсыз (батир жана үй) мүлкү, жер участогу (короо-жай участкаларынан башка) бар жеке жактар, ошондой эле юридикалык жакты түзбөй туруп ишмердигин ишке ашырган дыйкан жана фермердик чарбалар бирдиктүү салык декларациясын тапшырууга милдеттүү", — деп айтылат маалыматта.
Эскерте кетсек, 28-февралда юридикалык жактар үчүн декларациялык кампаниянын биринчи этабы аяктады.
Толук маалыматты салык кызматынын 194 номеринен же www.sti.gov.kg сайтынан алууга болот.
