БИШКЕК, 10-янв. — Sputnik. Бишкек шаардык соту Аида Салянованын ишин кароону судьялардын курамы толук болбогондуктан кайра 11-январга жылдырды. Сот отурумуна эл өкүлү келген жок.
9-январда болгон сот отурумунда дарыгер Салянованын саламаттыгы начарлап, ишке чыгууга жөндөмсүз экенин билдирген. Эмоционалдык кабатырлануунун жүрөккө терс таасир тийгизүү ыктымалдуулугу жогору болгондуктан депутаттын дарылануусу керектигин кошумчалаган.
Белгилей кетсек, 2017-жылы 10-октябрда Ленин райондук соту Аида Салянованы мүлкүн камакка алуу менен беш жылга эркинен ажыратуу өкүмүн кабыл алган. Бирок депутаттын 2015-жылы төрөлгөн баласы 14 жашка чыкканча чечимдин мөөнөтү жылдырылган.
Эл өкүлү юстиция министринин милдетин аткарып турганда кызмат абалынан кыянаттык менен пайдаланып, Алексей Елисеевдин адвокаттык лицензиясын калыбына келтирип берген деп айыпталууда.
