БИШКЕК, 4-дек. — Sputnik. Кыргыз-казак чек арасындагы "Ак-Тилек" көзөмөл өткөрүү пунктунан жүк ташуучу автоунаалар тездик менен өтүп, кезек күткөндөрдүн саны азайганын Мамлекеттик чек ара кызматынын маалымат катчысы Салкын Абдыкариева Sputnik Кыргызстан агенттигине билдирди.
"Учурда көзөмөл пунктунда 55тей машина турат. Биздин кызматкерлер өз милдеттерин так жана ылдам аткарып жатышат. Калган көзөмөл өткөрүү пунктарында кезек жок", — деди ал.
30 Жетинин айы 2017, 11:33
Эске салсак, кыргыз-казак чек арасындагы абал 10-октябрдан тарта кыйындай баштаган. Көзөмөл өткөрүү пунктуларынан өткөн жүк ташуучу унаалар жана жүргүнчүлөр тыкыр көзөмөлгө алынып, Астана бул кадамды чек арадан өтүп жаткан аткезчиликтин алдын алуу үчүн жасалып жатканын билдирген. КР премьер-министри Сапар Исаков баштаган атайын топ Казакстанга барып, сүйлөшүүлөрдү жүргүзгөнү менен абал жакшырган эмес.
Кийин Минск шаарында өткөн ЖККУнун кезектеги жыйынынын алкагында Кыргызстандын президенти Сооронбай Жээнбеков казак президенти Нурсултан Назарбаев менен жолугуп, чек арадагы абал жакын арада жөнгө салынарын билдиришкен.
