БИШКЕК, 19-окт. — Sputnik. Кыргыз-казак чек арасындагы көзөмөл өткөрүү пунктуларында абал жеңилдей баштагандыгы тууралуу Чек ара кызматы билдирди.
Маалыматка ылайык, учурда Токмок, Чалдовар өткөрүү жайларында унаалардын да, жарандардын да тыгыны дээрлик жокко эсе.
"Ал эми оор жүк ташуучу унаалардын көбү өткөн "Ак-Тилек" көзөмөл пунктунда 400гө чукул унаа кезек күтүп турат. Бирок ал жакта кыймыл мурунку күндөгүлөргө салыштырмалуу тездеп, казак тарап саатына жетиден унаа өткөрүүдө. Ал эми "Ак-Жол" көзөмөл пунктунда адамдардын тыгыны кичине бар, ошентсе да казак чек арасынан 10 мүнөттө 20дай киши текшерилип өтө баштады. Мисалы мурда 15-20 мүнөттө бир адам араң өтүп жатса, азыр бул убакытта 20дан ашык жаран Казакстандын аймагына кирүүдө", — деди Чек ара кызматынын өкүлдөрү.
"Чоң-Капка" өткөрүү бекетинде болсо жарандардын тыгыны дээрлик жок болуп, 100гө чукул жеңил, жүк ташуучу унаа кезек күтүп турарын Чек ара кызматы кошумчалап кетти.
