БИШКЕК, 7-авг. — Sputnik. "Элес" тобунун мурдагы мүчөсү Айдин Жумалиевге боор рагы деген диагноз коюлду. Эми текшерүүдөн өтүү үчүн беш миң доллар талап кылынууда. Бул тууралуу Sputnik Кыргызстан агенттигине музыканттын тууганы Айгерим Аширбекова билдирди.
Анын айтымында, Жумалиев үч ай мурун ооруй баштаган. Ооруканага барганда төртүнчү даражадагы рак болушу мүмкүн экени айтылган. Эми ооруну так аныктоо үчүн Түркияга барып текшерүүдөн өтүү талап кылынууда.
"Дарыланууга кете турган каражат диагнозго жараша болот. Текшерүүдөн өтүүгө жана дарыларга беш миң долларга жакын каражат керек. Бул сумманы 11-августка чейин чогултуу зарыл болуп жатат. Учурда Элсомго 900 сом гана түшүптүр. Көпчүлүк жардам бергилери келип жатканын айтканы менен жыйынтык башка болуп жатат", — деп Аширбекова билдирди.
Айдин Жумалиев "Элес" тобунун мүчөсү болгон. Музыканттар тобу 1985-жылдан 2002-жылга чейин элге кызмат кылган. Бул убакыт аралыгында алар беш альбом чыгарган. Ал эми үстүбүздөгү жылдын июль айында топ кайрадан түзүлгөнү маалым болду.
