ОШ, 29-июл. — Sputnik. Зульфия Тургунова. Өзгөндүн борбордук базарында таңда тутанган өрт саат 11:34тө толугу менен өчүрүлдү. Бул учурда жүздөгөн сатуучулар жалындаган аймакты көрүп, тыбырап, тызылдап чуркап жүрүштү.
Базар өрттөнүп жаткан учурда жанын коёорго жер таппай, бир бозоруп-бир кызарып жаман болгон сатуучуларды ара-чолодо кепке тарттык.
"Өрттөн алып чыккан алты футболканы кармап кала бердим"
Өзгөн шаарынын жашоочусу 57 жаштагы Умсунай Бубажанова 25 жылдан бери аталган базарда сатуучулук менен алектенип, тапкан кирешеси менен үй-бүлөсүн багып келген. Эки кыз, бир уулдун энеси. Өрткө 150 миң сомун жалматыптыр.
"Базардан башка кирешебиз жок. Таңкы саат жетиде туугандарым "базар өрттөнүп жатат экен" деп телефон чалышты. Эркектердин кийимин саткан бир контейнерим менен кошо дагы бир соода жайым бар эле. Кышкы кийимдерди салган сандыгым кыпкызыл чок болуп жанына киши жологус абалда экен. Базардагылар алты даана футболка алып чыкканга жетишиптир. Ошентип тилсиз жоодон ошол алтоону кармап кала бердим", — деди ал.
Соодагер аял товарларды коңшу райондогу "Кара-Суу" базарынан алып келе тургандыгын айтты.
"Баш-аягы 150 миң сомдук товарым бар болчу. Өрттөлгөн кийимдерди кармалап, арасынан жарактуусун таппай койдум. Мамлекет аз да болсо жардам берсе жакшы болмок" — деди Бубажанова.
Жалгыз бой аялдын өрт жалмаган жарым миллион сомго жакын акчасы…
"Күйөөм жок, эки кыз, эки уулду базардан тапкан кирешем менен бакчумун. Эми эмне кылам? Өзүм да билбейм, башым катып турган чак. Өрт тууралуу эртерээк билсек, балким товарларды алып чыгып кетүүгө үлгүрмөк белек. Жалпы 450 миң сомдук товарым өрттөнүп кетпедиби, айланайын", — дейт ал.
Таңдагы жагымсыз кабар
Биз кепке тарткан Ош облустук Өрткө каршы кызматынын өрттүн алдын алуу бөлүмүнүн башчысы Музаффар Жороевдин маалыматында, өрт тууралуу билдирүү 4:41 де түшкөн.
Анын айтымында, өрттүн чыгуу себеби азырынча белгисиз. Учурда аныктоо иштери жүргүзүлүп жатат жана канча чыгым болгондугун тиешелүү тараптар тактоодо.
"226 контейнер өрттөнгөн. Мындан сырткары, бут кийим сатуучу үстү жабылган соода жайы жана эки кабаттуу ашкананын имараты күйгөн" – деди Жороев.
Аталган базарда үч катар соода түйүндөрү товарлары менен кошо өрттөнүп кеткен.
Учурда өрттөнгөн контейнерлерден башка аман калган соода түйүндөрү иштеп, соода-сатык уланууда.
Өрт болгон жерден Өзгөн шаарынын вице-мэри Мухаммед Макешовго суроо узатып, базардын мындан аркы тагдырына кызыктык. Анын айтымында, Өзгөн шаарындагы базар он эки ишкерге таандык.
"Соода түйүндөрү жеке менчик болгондуктан өрттөн кийин сооданы токтотобу же улантабы ал ишкерлердин өз укугу", — деди Макешов.
Күлгө айланган базардын ичин сатуучулар ашар жолу менен тазалап жатышат.
