БИШКЕК, 5-июл. — Sputnik. Ананьево айылындагы жарылуудан жабыркагандардын экөө оор абалда жатат. Бул тууралуу Травматология жана ортопедия илим изилдөө борборунун башчысынын орун басары Бакыт Исаков билдирди.
Маалыматка ылайык, учурда Ысык-Көл районундагы жарылуудан жаракат алган беш адам Травматология жана ортопедия илим-изилдөө борборунун дарыгерлеринин көзөмөлүндө.
Исаковдун айтымында, эки бейтаптын абалы оор.
"Бизге денеси күйгөн бейтаптарды Ысык-Көлдөн которушкан. Азыр экөөнүн абалы оор болуп жатат. Калган үчөөнүкү туруктуу", — деди дарыгер.
Аталган ооруканада 27-июнда жабыркагандардын бирөө көз жумган. Анын денесинин 65 пайызы күйгөн.
Эске сала кетсек, 19-июнда болжол менен саат 17.22лерде Ананьево айылынын Совет көчөсүндө май куюучу жайдын жанынан газ баллондор жарылган. Анын кесепетинен 52 жаштагы эркек киши жана анын 10 жаштагы баласы каза таап, 8 адам ооруканага жеткирилген.
