БИШКЕК, 23-июн. — Sputnik. Казакстан өзүнүн аскерлерин Сирияга жөнөтүү боюнча эч ким менен сүйлөшүүлөрдү жүргүзгөн эмес. Бул тууралуу Sputnik Казакстан агенттиги Казакстандын ТИМ башчысы Кайрат Абдрахмановго таянуу менен жазып чыкты.
Эске сала кетсек, Мамлекеттик Думанын Коргонуу комитетинин жетекчиси Владимир Шаманов РИА Новости агенттигине Россиянын Сирияга Кыргызстандын жана Казакстандын аскерлерин киргизүү боюнча сүйлөшүүлөр жүрүп жатканын тастыктаган. Ага чейин болсо, Түркия президентинин өкүлү Ибрагим Калын Россия Сирияга аталган эки өлкөнүн аскерлерин киргизүү сунушун айтканын билдирген.
"Астана Сириядагы маселени чечүүгө аянт түзүп, өз салымын кошту. Бирок Казакстан өзүнүн аскерлерин Сирияга жөнөтүү боюнча эч ким менен сүйлөшүүлөрдү жүргүзгөн жок", — деди Абдрахманов.
Белгилей кетсек, Астанадагы 3-4-майдагы сүйлөшүүлөр маалында Сириядагы абалды жөнгө салууга кепилдик кылган мамлекеттер (Россия, Иран, Түркия) Сирияда төрт деэскалация аймагын түзүү боюнча меморандумга кол коюшкан.
